تعالي سرك في بييييير ؟؟؟

السلام عليكم ورحمه الله وبركاته

(( سرك في بيير ))

كلمة دايما بنسمعها وموجوده بينا كتير ومعناها الالتزام بعدم افشاء الاسرار والحفاظ عليها بين الطرفين وكمان بنقولها لما بنحب نطمئن حد اننا هانحفظ سره ومحدش هايعرفه غير انا وهو بس لان السر اذا عرفه اكتر من اتنين مبقاش سر اصلا ..

وعلى ضوء الموضوع ده بتقول سيده تدعى هدى هذا الكلام

هدى وهي سيدة اربعينية وربة منزل عانت ممن كانت تعدها صديقة عمرها اذ اذاعت اسرارا كانت قد امنتها عليها .. هدى ترى ان هذا الزمن لا مكان فيه لسر ولا تجوز الثقة المطلقة بالاشخاص الى درجة اعطائهم اوراقا يلعبون بها كيفما يرغبون.
وتقول هدى ان ما قامت به «صديقتها او التي كانت كذلك» كاد ان يؤثر على حياتها الزوجية ويؤدي بها الى الطلاق وتشريد اطفالها الاربعة عندما حاولت ان تفتن بينها وبين زوجها عبر توظيفها لمعلومات قديمة بطريقة خاطئة وتوصيلها للزوج بخبث . وتابعت : ولولا ان زوجي الواثق من صدقي وسلوكي تفهم حقيقة الامر لنجحت صديقتي «العزيزة» في تمرير ما تريد رغم اني كنت اكن لها كل التقدير واعتبرها احدى شقيقاتي الثلاث مؤكدة : « لن اثق بعد اليوم بانسان وصرت ادرك متى افضفض ومتى اسكت» .

واكيد زي هدى فيه كتير من الناس اتصدمت في ناس قريبة منهم او كانوا فاكرينهم اصدقاء او مقربين وحصل العكس وانا من الناس اللي بتؤيد رأي هدى بشده ولكن وان كان لابد اننا نقول السر لازم ننتقي الناس اللي هانقوله ليها وتكون ثقه فعلا ولا انتوا ايه رأيكم

وبمناسبة الاسرار والموضوع ده تذكرت احدى حلقات الشيخ محمود المصري جزاه الله خيرا .. انه كان بيتكلم على موضوع السر وان الناس بتزعل اوي مع بعض وتقاطع بعض وتحصل خصومة جامده ومشاكل بسبب ان حد قال لحد سر والشخص التاني ملتزمش بيه وقال الشيخ كلمة جميلة عجبتني فعلا

(( اذا كان انت صاحب السر لم تستطع الابقاء عليه مع نفسك وقولته لشخص تاني يبقى من المتوقع والمحتمل ان الشخص التاني ده برضو ميقدرش يحتفظ بالسر زي ما انت نفسك صاحب السر مقدرتش تحتفظ بيه ))

صح الكلام ولا ايه أنتوا ايه رأيكم في الموضوع نقول اسرارنا لناس ثقه اوي ونعرف الناس الثقه دي منين ولا الافضل منقولهاش خالص ؟؟؟؟؟

في انتظار مشاركاتكم معايا يا اجمل هوانم