هحكلم حكاية صحبتي علشان تاخدوا عظة وعبرة منها

هحكلم حكاية صحبتي علشان تاخدوا عظة وعبرة منها وعلشات تدعولها بارك الله فيكم رجع جوز صحبتي من السعوديه هو وعياله بعد ما قضت صحبتي الصيف معاه
وراحوا اشتروا عربيه من معرض معروف في الاسماعيليه ويوم الاثنين الي فات راحت صحبتي هى وعيالها وجوزها المعرض قبل الفطار علشان يستلموا العربيه وفعلا استلموها عربيه كيا سوراتوا احدث موديل على مسؤليتهم بدون نمر لحد لما المعرض يوصله ورق العربيه علشان الترخيص
وراحت من الفرحه تلف في البلد عندنا الاسماعيليه صغيره وممكن تلفها في ساعه وقرب معاد الفطار وقفت صحبتي بالعربيه هى وجوزها علشان تجيب حاجه من السوبر ماركت وسابت العيال في العربيه وهى شغاله ونزلت هى وجوزها علما ان عيالها صغيرين
وفاجاه حس جوز صحبتي بحركة العربيه فجري لقى فيها واحد فمسك الاكره والله ولا الافلام الاجنبي الله المستعان
مسك الاكره بتاعة العربيه لان النوع ده من العربيات اكرته كبيره والحرامي اسرع بالعربيه ومرحمش لهفة الراجل على عياله وهو بيقول عيالي عيالي ومسح بالراجل الارض والعيال جوه العربيه بيصرخوا على ابوهم الي اتبهدل واتمسح بيه الشارع وطبعا الراجل مستحملش ووقع على الارض لان الحرامي سرع جدا
وصحبتي نفسها اتقطع من الصريخ ادام السوبر ماركت على عيالها الي اتخطفوا وجوزها الي اتبهدل
والسرقه ديه حصلت في الشارع التجاري وهو شارع كبير عندنا وديما زحمه بس الوقت كان قبل الفطار بدقايق ومكنش حد كتير
ولاد الحلال الي شافوا الراجل الي اتبهدل حبوا يقفلوا على العربيه الطريق فالحرامي الي ربنا ينتقم منه خبط فيهم ورجع لورا ولما لحقته العربيات الي ورا خبطهم ووقف لحظات ونزل العيال وقعد يخبط في العربيات لحد لما فتح له طريق وهرب و****ر اربع عربيات حاولت توقفه وتخيلوا صحبيتي وجوزها وعيالها وسط العربيات الي بتتخبط وهما اطفال وجوز صحبتي اتبهدل واتعور جامد
بس الحمد لله انه نزل العيال لانه حس ان الناس مش هتسيبه
وانا كتبت ليكم الموضوع ده للعظه واوعي تنزلي من العربيه وهى شغاله ابدا وخاصة لو عيالك فيها
والسبب التاني علشان تدعوا لصحبتي يلاقوا العربيه لانها فص ملح وداب وراح عليهم 112 الف جنيه والله من شقاهم وغربتهم وربنا يصبرهم ويعوضهم على ما ابتلاهم

الحكاية دى يا جماعة حصلت لمهندس صديق أحمد إبنى وجارة فى العمارة فى السعودية ادعوا له ربنا يعوضة خير ويهدى نفسية اولادة لأنهم حصلت لهم حالة من الفزع والهلع فظيعة بعد ان رأو ا المشهد المرعب دة وهم اطفال صغار

اللهم انتقم ممن فزعهم ورعبهم و سرق عربيتهم

ربنا يصبرهم ويعوضهم كل خير
يا رب يلاقوها ان شاء الله
والحمد لله ان الاولاد بخير ده اهم شيء

ربنا يعوض عليهم يارب ترك المفاتيح فى العربية من اخطر مايمكن ربنا يعوض عليهم يارب

الحمد لله والشكر لله إن الحرامى نزل الاولاد من العربية بس ازاى ناس متعلمة وفاهمة
يسيبوا المفاتيح فى العربية وينزلوا هما الاثنين ويسيبوا الاولاد كمان سبحان الله الناس
موش بتتعظ ابدا غير لما تشوف بلاوى غيرها وبعدين يعملوا كده تانى ربنا يهدينا جميعا
ويبعد عننا الشر يارب

الحمدلله انه نزل الولاد
فعلا اخطر حاجه ترك المفاتيح بتسهل السرقه قوى
ربنا يعوض عليهم ان شاء الله
لاحول ولاقوة الا بالله

فعلا ترك المفاتيح في العربية من اخطر مايمكن
الحمد لله انها جت علي كدا ربنا يعوض عليهم